சு.கவின் உதவியின்றி எக்கட்சியும் ஆட்சியமைக்க முடியாது

சு.கவின் உதவியின்றி எக்கட்சியும் ஆட்சியமைக்க முடியாது

உள்ளூராட்சி தேர்தல் இதனை உணர்த்துகிறது
உள்ளூராட்சி தேர்தலில் ஸ்ரீலங்கா சுதந்திரக் கட்சிக்கு கிடைத்த வாக்குகளுடன் ஒப்பிடுகின்ற போது எந்தவொரு அரசியல் கட்சிக்கும் ஸ்ரீலங்கா சுதந்திரக் கட்சியின் உதவியின்றி ஆட்சியமைக்க முடியாது என்று தெரிவித்த ஜனாதிபதி, இந்த பெறுபேறுகளை அடிப்படையாக கொண்டு ஸ்ரீலங்கா சுதந்திரக் கட்சியை எதிர்காலத்தில் தெளிவான வெற்றியை நோக்கி முன்னெடுத்துச் செல்வதாக தெரிவித்தார்.
கடந்த உள்ளூராட்சி தேர்தலின்போது பொலன்நறுவை மாவட்ட உள்ளூராட்சி மன்ற நிறுவனங்களுக்கு தெரிவுசெய்யப்பட்ட ஸ்ரீ லங்கா சுதந்திரக் கட்சி உறுப்பினர்கள் பதவிப்பிரமாணம் செய்யும் நிகழ்வு நேற்று (26) பொலன்நறுவை ரோயல் கல்லூரி கேட்போர் கூடத்தில் இடம்பெற்றது. இந்த நிகழ்வில் கலந்துகொண்டு உரையாற்றும்போதே ஜனாதிபதி இதனை தெரிவித்தார்.
வெற்றி குறித்து உற்சாகத்தில் யார் எப்படி நடந்துகொண்டாலும் கடந்த உள்ளூராட்சி தேர்தலில் போட்டியிட்ட எந்தவொரு அரசியல் கட்சிக்கும் அளிக்கப்பட்ட வாக்குகளில், 40 வீதத்திற்கு அதிகமாக பெற்றுக்கொள்ள முடியவில்லை என்று ஜனாதிபதி குறிப்பிட்டார்.
இந்த தேர்தல் பாராளுமன்ற தேர்தலாக இருந்திருப்பின் எந்தவொரு அரசியல் கட்சிக்கும் ஆட்சி அமைப்பதற்கான பலம் கிடைத்திருக்காது என்பது அறிக்கைகளின் மூலம் தெரியவந்திருப்பதாக குறிப்பிட்ட ஜனாதிபதி, ஸ்ரீலங்கா சுதந்திரக் கட்சிக்கு கிடைத்த வாக்குகளுடன் ஒப்பிடுகின்ற போது எந்தவொரு அரசியல் கட்சிக்கும் ஸ்ரீ லங்கா சுதந்திரக் கட்சியின் உதவியின்றி ஆட்சியமைக்க முடியாது என்றும் தெரிவித்தார்.
இந்த தேர்தல் பெறுபேறுகள் குறித்து எவரும் குழப்பமடையவோ, குதூகலிக்கவோ தேவையில்லை என்றும், இந்த பெறுபேறுகளை அடிப்படையாக கொண்டு ஸ்ரீலங்கா சுதந்திரக் கட்சியை எதிர்காலத்தில் தெளிவான வெற்றியை நோக்கி முன்னெடுத்துச் செல்வதாக வும் ஜனாதிபதி தெரிவித்தார்.
இதற்குத் தேவையான அனைத்து நடவடிக்கைகளையும் எவ்வித குறையுமின்றி மேற்கொள்ள கட்சி தலைவர் என்றவகையில் அர்ப்பணிப்புடன் உள்ளதாக ஜனாதிபதி தெரிவித்தார்.
சிறந்த அரசியல் கலாசாரத்திற்கான ஒழுக்கப் பண்பாடுகளுடன் புதிய உறுப்பினர்கள் செயற்பட வேண்டியதன் அவசியத்தை வலியுறுத்திய ஜனாதிபதி, தமது பொறுப்புக்களை மக்களுக்காக உரிய முறையில் நிறைவேற்ற வேண்டியதன் அவசியத்தையும் சுட்டிக் காட்டினார்.
தமன்கடுவ நகர சபை, தமன்கடுவ பிரதேச சபை, திம்புலாகலை பிரதேச சபை, வெலிகந்த பிரதேச சபை, ஹிங்குராங்கொடை பிரதேச சபை, லங்காபுர பிரதேச சபை, மெதிரிகிரிய பிரதேச சபை மற்றும் எலஹர பிரதேச சபை ஆகிய உள்ளூராட்சி நிறுவனங்களுக்கு தெரிவு செய்யப்பட்ட பிரதிநிதிகள் இதன்போது பதவிப்பிரமாணம் செய்தனர்.
புதிய உறுப்பினர்களுக்கு ‘மகாத்மா காந்தி’ என்ற நூலும் நெல்சன் மண்டேலாவின் சுயசரிதை தொடர்பான நூலும் ஜனாதிபதியினால் வழங்கி வைக்கப்பட்டன.
பிரதேச அரசியல் பிரதிநிதிகள் பலரும் இந்நிகழ்வில் கலந்துகொண்டனர். 
Read more »

பிரதமருக்கு எதிரான பிரேரணைக்கு த.மு.கூட்டணி எதிராகவே வாக்களிக்கும்

பிரதமருக்கு எதிரான பிரேரணைக்கு த.மு.கூட்டணி எதிராகவே வாக்களிக்கும்

பிரதமர் ரணில் விக்கிரமசிங்கவுக்கு எதிரான நம்பிக்கையில்லா பிரேரணைக்கு எதிராக வாக்களிக்கும் மனநிலையிலேயே தமிழ் முற்போக்கு கூட்டணி உள்ளதாக தேசிய சகவாழ்வு கலந்துரையாடல் மற்றும் அரச கரும மொழிகள் அமைச்சர் மனோ கணேசன் தெரிவித்தார்.
தலவாக்கலையில் (26)இடம்பெற்ற நிகழ்வு ஒன்றில் கலந்து கொண்டு ஊடகங்களுக்கு கருத்து தெரிவிக்கும் போதே அவர் இவ்வாறு தெரிவித்தார்.
அவர் மேலும் தெரிவிக்கையில்,
ஆளும் கட்சியின் பங்காளியாக நாம் இருக்கின்ற பொழுதிலும் ஐக்கிய தேசிய கட்சி துரோகம் இழைப்பதால் பேச்சுவார்த்தை நடத்திவிட்டு முடிவு ஒன்றை எடுக்க நாம் தள்ளப்பட்டுள்ளோம். எங்கள் கட்சிக்கும், அவரின் கட்சிக்கும் இடையில் பல்வேறு பிரச்சினைகள் இருக்கின்றன. உள்ளுராட்சி தேர்தலின் பொழுது பல இடங்களில் உறுதியளிக்கப்பட்ட பட்டியலின் உறுப்பினர்கள் தராமல் ஐக்கிய தேசிய கட்சி துரோகம் செய்துள்ளது.
கொழும்பில் மட்டுமல்லாது நுவரெலியாவிலும் இரண்டு, மூன்று ஆசனங்களை எங்களுக்கு தராமல் ஐக்கிய தேசிய கட்சி ஏமாற்றியுள்ளது.
இதற்கு அவர்கள் பதில் கூற வேண்டும். உரிய பதில் கிடைத்தால் மாத்திரமே நாங்கள் நம்பிக்கையில்லா பிரேரணை தொடர்பில் தீர்மானிப்போம்.
ஆனால் நம்பிக்கையில்லா பிரேரணையை பயன்ப்படுத்திக் கொண்டு கீழ்த்தரமாக கொள்கை மாறி பணத்திற்கு விலை போய், பதவிக்கு சோரம் போகும் கொள்கை எம் கட்சிக்கு கிடையாது.
அதேபோல் இவ்வாறான நல்ல சிந்தை, நல்ல கொள்கை, நல்ல எண்ணம், கௌரவமான நடத்தை ஐக்கிய தேசிய கட்சிக்கும் இருக்க வேண்டும். அதன் தலைவர் ரணில் விக்கிரமசிங்கவுக்கும் இருக்க வேண்டும் என தெரிவித்துக் கொள்கின்றேன் என அவர் மேலும் தெரிவித்தார்.
Read more »

அமைச்சர்கள், எம்.பிக்களின் வெளிநாட்டுப் பயணங்கள் இரத்து

அமைச்சர்கள், எம்.பிக்களின் வெளிநாட்டுப் பயணங்கள் இரத்து 











* வெளிநாடு சென்றோருக்கும் அவசர அழைப்பு
* நம்பிக்ைகயில்லா தீர்மானத்தை எதிர்கொள்ள ஜ.தே.க. தயார்
பிரதமருக்கு எதிராகக் கொண்டுவரப்பட்டுள்ள நம்பிக்கையில்லா தீர்மானத்தைக் கருத்தில் கொண்டு அமைச்சர்கள் மற்றும் ஆளுங்கட்சி பாராளுமன்ற உறுப்பினர்களின் சகல வெளிநாட்டுப் பயணங்களும் இரத்துச்செய்யப்பட்டுள்ளன.
ஏப்ரல் 2ஆம் திகதியிலிருந்து 6 ஆம் திகதி வரை சகல வெளிநாட்டு பயணங்களையும் இரத்துச் செய்யுமாறு கேட்கப்பட்டுள்ளது.
தற்பொழுது வெளிநாடு சென்றுள்ள உறுப்பினர்கள் அனைவரையும் தமது பயணங்களை சுருக்கிக் கொண்டு ஏப்ரல் முதலாம் திகதி நாடு திரும்புமாறு கோரிக்கை விடுக்கப்பட்டிருப்பதாக ஐ.தே.க பாராளுமன்ற உறுப்பினர் பேராசிரியர் ஆஷூ மாரசிங்க தெரிவித்தார்.
ஐ.தே.க தலைமையகமான சிறிகொத்தவில் நேற்று நடைபெற்ற ஊடகவியலாளர் சந்திப்பில் கருத்துத் தெரிவிக்கும்போதே அவர் இதனைக் கூறினார்.
"தற்பொழுது கையளிக்கப்பட்டுள்ள நம்பிக்கையில்லாப் பிரேரணை பிரதமர் ரணில் விக்கிரமசிங்கவை மாத்திரம் குறிவைக்கவில்லை. அரசாங்கத்தையே குறிவைத்துள்ளது. இந்தப் பிரேரணையை நிச்சயமாகத் தோற்கடிப்போம். நம்பிக்கையில்லாப் பிரேரணையை காலதாமதப்படுத்தி தமிழ்,சிங்கள வருடப்பிறப்புக்குப் பின்னர் எடுப்பதற்கு ஒன்றிணைந்த எதிர்க்கட்சியினர் கட்சித் தலைவர்கள் கூட்டத்தில் முயற்சித்தனர். எனினும், அரசாங்கம் இதற்கு முன்னுரிமை அளித்துள்ளது" என்றார். அரசாங்கத்தில் பதவிகளை வகிக்கும் எந்தவொரு உறுப்பினருக்கும் இந்த நம்பிக்கையில்லா பிரேரணைக்கு ஆதரவளிக்க தார்மீகப் பொறுப்பு கிடையாது. அப்படி ஆதரவளிக்க விரும்புபவர்கள் ஏப்ரல் 4ஆம் திகதிக்கு முன்னர் தமது பொறுப்புக்களிலிருந்து விலகவேண்டும். நம்பிக்கையில்லாப் பிரேரணையின் பின்னர் நாம் புதிய பயணத்தை உத்வேகத்துடன் ஆரம்பிப்போம். அரசாங்கத்தை காலைப்பிடித்து இழுப்பவர்களுக்கு அரசில் இடமில்லை என்றார்.
ஐக்கிய தேசியக் கட்சிக்கும் லங்கா சுதந்திரக் கட்சிக்கும் இடையிலான புரிந்துணர்வு ஒப்பந்தத்தை நீடிப்பதா? இல்லையா? என்பது ஏப்ரல் 4ஆம் திகதிக்குப் பின்னர் தீர்மானிக்கப்படும். ஶ்ரீலங்கா சுதந்திரக் கட்சியின் உறுப்பினர்கள் பலர் ஐக்கிய தேசியக் கட்சியுடன் இணைந்து பணியாற்றுவார்கள் என்றும் அவர் நம்பிக்கை வெளியிட்டார்.
ஐக்கிய தேசியக் கட்சியின் செயற்குழு எதிர்வரும் வியாழக்கிழமை கூடி கட்சியின் மறுசீரமைப்பு தொடர்பில் தீர்மானிக்கவிருப்பதுடன், சிங்கள, தமிழ் புத்தாண்டுக்கு முன்னர் மாற்றங்கள் ஏற்படும் என்றும் தெரிவித்தார். ஶ்ரீலங்கா சுதந்திரக் கட்சியினர் பிரேரணைக்கு ஆதரவாக வாக்களிக்கத் தீர்மானித்தாலும் இதில் வெற்றிபெற முடியும் என்ற நம்பிக்கையுடன் இருக்கின்றோம்.
"நாங்கள் மாற்றுத் திட்டங்களையும் தயாரித்துவைத்துள்ளோம். இரட்டை நிலைப்பாட்டில் உள்ள அரசாங்க உறுப்பினர்களை வெளிக்காட்டுவதற்கு நல்லதொரு சந்தர்ப்பம் கிடைத்துள்ளது. அரசாங்கத்தை சுத்தப்படுத்தி தொடர்ந்து முன்செல்ல முடியும்" என்றார்.
அரசாங்கத்துக்கும் பிரதமருக்கும் எதிராகக் கொண்டுவரப்பட்டுள்ள நம்பிக்கையில்லா பிரேரணையானது, அரசியலமைப்பின் படி அரசாங்கத்தின் தலைவர் என்ற ரீதியில் ஜனாதிபதிக்கும் ஏற்புடையது என ஐக்கிய தேசியக் கட்சியின் பின்வரிசை உறுப்பினர்களான பேராசிரியர் ஆஷூ மாரசிங்க மற்றும் விஜயபால ஹெட்டியாராச்சி ஆகியோர் தெரிவித்தனர்.
பிரதமர் ரணில் விக்ரமசிங்கவை அகற்றுவதற்கு சதித்திட்டம் மேற்கொள்ளப்படுகிறது. அடுத்த இலக்கு ஜனாதிபதி மற்றும் சபாநாயர்களாகும் என அவர்கள் மேலும் குறிப்பிட்டனர்.
Read more »