ஊட்டச்சத்து குறைபாடு: யெமனில் 85,000 குழந்தைகள் உயிரிழப்பு




யெமனில் கடந்த மூன்றாண்டுகளாக நடந்து வரும் போரின்போது மட்டும், கடுமையான ஊட்டச்சத்து குறைபாட்டின் காரணமாக ஐந்து வயதிற்குட்பட்ட சுமார் 85,000 குழந்தைகள் உயிரிழந்திருக்கலாம் என்று மதிப்பீடுகள் தெரிவிப்பதாக முன்னணி தொண்டு நிறுவனமொன்று குறிப்பிட்டுள்ளது.

யெமனில் உயிரிழந்துள்ள குழந்தைகளின் எண்ணிக்கை, பிரிட்டனின் இரண்டாவது மிகப் பெரிய நகரமான பர்மிங்ஹாமிலுள்ள ஒட்டுமொத்த ஐந்து வயதிற்குட்பட்ட குழந்தைகளின் எண்ணிக்கைக்கு சமம் என்று ‘சிறுவர்களை பாதுகாப்போம்’ என்ற அமைப்பு தெரிவித்துள்ளது.

யெமனில் அதிகபட்சம் 14 மில்லியன் மக்கள் பஞ்சத்தின் பிடியில் சிக்கியுள்ளதாக கடந்த மாதம் ஐக்கிய நாடுகள் சபை எச்சரித்திருந்தது.





உலகிலேயே மோசமான மனிதாபினாம நெருக்கடியாக கருதப்படும் மூன்றாண்டுகளாக நடந்து வரும் யெமன் உள்நாட்டுப் போரை முடிவுக்கு கொண்டுவருவதற்கு ஐ.நா சபை முயற்சித்து வருகிறது.

எனினும் உயிரிழந்தவர்களின் சரியான எண்ணிக்கையை உறுதி செய்ய முடியாதுள்ளது. நாட்டின் அரை பகுதியில் மாத்திரமே சுகாதார வசதிகள் இயங்கிவரும் நிலையில் பலரும் எந்த பதிவும் இன்றி உயிரிழப்பதாக யெமன் தொண்டு பணியாளர்கள் குறிப்பிட்டுள்ளனர்.