இன்டர்போல் புதிய தலைவராக தென் கொரியாவின் யாங் தேர்வு




இன்டர்போல் சர்வதேச பொலிஸ் அமைப்பின் தலைவராக தென் கொரியாவின் கிம் ஜோங் யாங் தேர்வு செய்யப்பட்டுள்ளார்.

இந்த அமைப்பின் தலைவராக இருந்த சீனாவின் மெங் ஹோங்வெய், சில நாட்களுக்கு முன்னர் சொந்த ஊருக்கு சென்ற போது மாயமானர். பின்னர், ஊழல் குற்றச்சாட்டில் அவர் கைது செய்யப்பட்டதாகவும், அவர், பதவியை இராஜினாமா செய்துவிட்டதாகவும் சீனா விளக்கமளித்தது.

இதனையடுத்து தற்போது துணை தலைவராக இருக்கும் ரஷ்யாவின் அலெக்சாண்டர் புரோகோப்சக் தலைவர் பதவிக்கான போட்டியில் களமிறங்கினார். எனினும் அமெரிக்கா உள்ளிட்ட மேற்கத்திய நாடுகளின் ஆதரவுடன் தென் கொரியாவின் கிம் ஜோங் யாங் களமிறங்கினார். ரஷ்யா ஆதரவு பெற்ற அலெக்சாண்டர், தலைவர் பதவிக்கு வர மேற்கத்திய நாடுகள் அச்சம் தெரிவித்தன.

தொடர்ந்து, கிம் ஜோங் யாங், தலைவராக தேர்வு செய்யப்பட்டதாக இன்டர்போல் அமைப்பு தெரிவித்துள்ளது.





57 வயதான யாங் முன்னாள் தென் கொரிய பொலிஸ் அதிகாரி என்பதோடு அந்நாட்டின் அதிக மக்கள் தொகை கொண்ட மாகாணமான கியேங்கியின் பொலிஸ் தலைவராகவும் இருந்துள்ளார்.

இன்டர்போல் தலைமை பதவி ஓர் அடையாள பொறுப்பாகவே உள்ளது. அந்த அமைப்பின் அன்றாட நடவடிக்கைகளை அதன் செயலாளர் நாயகம் ஜுர்கன் ஸ்டொக் முன்னெடுத்து வருகிறார்.

194 நாடுகளின் போலிஸ் படைகளை ஒன்றிணைத்த இன்டர்போல் தேடப்படும் நபர்கள் மற்றும் தேடுதல் உதவிகள் மற்றும் உளவுத் தகவல்களை பகிர்ந்துகொள்ளும் அமைப்பாகும்.

இன்டர்போலுக்கு சொந்தமான அதிகாரிகள் இல்லாத நிலையில் உறுப்பு நாடுகளில் தேசிய பொலிஸார் ஊடாகவே நடவடிக்கைகள் மேற்கொள்ளப்படுகின்றன.