சவூதிக்கு ஆயுத ஏற்றுமதியை இடைநிறுத்தியது டென்மார்க்




செய்தியாளர் ஜமால் கசோக்கி கொலை மற்றும் யெமன் யுத்தத்தில் சவூதி அரேபியாவின் தொடர்பு காரணமாக அந்நாட்டுக்கு எதிர்காலத்தில் ஆயுதம் மற்றும் இராணுவ உபகரணங்கள் ஏற்றுமதியை டென்மார்க் இடைநிறுத்தியுள்ளது.

ஜெர்மனி ஏற்கனவே சவூதிக்கான ஆயுத ஏற்றுமதியை இடைநிறுத்தியதோடு கசோக்கி கொலை தொடர்பில் சவூதி மீது தடை விதிப்பது குறித்து விரைவில் தீர்மானிக்கப்படும் என்று பிரான்ஸ் கடந்த திங்கட்கிழமை குறிப்பிட்டிருந்தது. உலகின் மிகப்பெரிய ஆயுத இறக்குமதி நாடுகளில் ஒன்றாக சவூதி உள்ளது. அதன் தலைமையிலான இராணுவ கூட்டணி ஒன்று ஆயிரக்கணக்கான மக்கள் கொல்லப்பட்டிருக்கும் யெமன் யுத்தத்தில் பங்கேற்றுள்ளது.





“ஏற்கனவே மோசமடைந்திருக்கும் யெமனில் தொடரும் அழிவுகள், சவூதி செய்தியாளர் ஜமால் கசோக்கி கொலை மற்றும் ஐரோப்பிய ஒன்றிய வெளியுறவு அமைச்சர்களின் அண்மைய பேச்சுவார்த்தைகளுக்கு அமைய சவூதி அரேபியாவுக்கு ஆயுத ஏற்றுமதியை இடைநிறுத்த நான் தீர்மானித்துள்ளேன்” என்று டென்மார்க் வெளியுறவு அமைச்சர் அன்டெர்ஸ் சாமுவேல்சன் ட்விட்டரில் குறிப்பிட்டுள்ளார்.