சமூக வலைத்தளங்களில் பரவும் போலிச் செய்திகள்!




வதந்திகளுக்கு எல்லையே கிடையாதா?

இந்தியாவின் சதுரகிரி மலையில் 'மஹாமேரு புஷ்பம்' என்ற ஒருவகை பூக்கள் 400 ஆண்டுகளுக்குப் பிறகு பூத்துள்ளதாக சமூக வலைத்தளங்களில் வைரலாக பகிரப்படும் புகைப்படங்கள் போலியானவை என்று தாவரவியல் ஆராய்ச்சியாளர்கள் தெரிவித்துள்ளனர்.

சதுரகிரி மலையில் 400 ஆண்டுகளுக்குப் பிறகு மஹாமேரு புஷ்பம் என்ற அரியவகை பூக்கள், தற்போது பூத்துள்ளதாக புகைப்படங்கள் சமூக வலைத்தளங்களில் வைரலாகி வருகின்றன. அதில் "முடிந்தவரை மற்றவர்களும் பார்த்திடப் பகிருங்கள்" என்று குறிப்பிடப்பட்டு புகைப்படங்களுடன் பரப்பப்படுகின்றன.





"சமூக வலைத்தளங்களில் 400 ஆண்டுகளுக்கு ஒருமுறை பூக்கும் என பரப்பப்படுபவை ஓர்க்கிட் வகை செடியின் மலர்கள் மற்றும் காசித் தும்பை வகையைச் சேர்ந்த மலர்கள் போன்று உள்ளன. அதிலும் அவை 'கிராபிக்ஸ்' செய்யப்பட்டுள்ளன. 'மஹாமேரு புஷ்பம்' என்ற வகை மலர்களே கிடையாது. ஓர்க்கிட் வகை மலர்கள் வெளிநாட்டு ரகத்தைச் சேர்ந்த அலங்காரச் செடியில் பூப்பவையாகும். மலர்ச்செண்டு தயாரிப்பதற்கும், வீடுகளில் அழகுக்காகவும் இதை வளர்ப்பர்.

அதிக மழை பெய்து குளிர்ந்த காலநிலை நிலவும்போது இவை நன்கு வளரும். காசித் தும்பை மலர்ச் செடிகள் 3 மாதங்கள் மட்டுமே உயிரோடு இருப்பவை. உலகத்தில் எந்த இடத்திலும் 400 ஆண்டுகளுக்கு ஒருமுறை பூக்கும் செடிகளே இல்லை. அதிகபட்சம் குறிஞ்சி மலர் 12 ஆண்டுகளுக்கு ஒரு முறை பூப்பவை. அது ஏன் என்ற காரணம் இதுவரை கண்டறியப்படவில்லை.

ஆனால், அவை அனைத்து இடங்களிலும் 12 ஆண்டுகளுக்கு ஒருமுறை பூக்காது. சில இடங்களில் மட்டும் ஆங்காங்கே பூக்கின்றன. ஒரே நேரத்தில், அதிகளவில் 12 ஆண்டுகளுக்கு ஒருமுறை குறிப்பிட்ட இடங்களில் பூப்பதால், குறிஞ்சி மலர் 12 ஆண்டுகளுக்கு ஒருமுறை பூப்பதாக வரலாறு பதிவாகி விட்டது. வதந்திகளை சுவாரசியமாக்க படங்களை போலியா 'போட்டோ ​ெஷாப்' செய்து சிலர் திட்டமிட்டு பரப்புகின்றனர்" என்று தமிழ்நாட்டின் காந்தி கிராமப் பல்கலைக்கழக உயிரியியல் துறை உதவிப் பேராசிரியரும், தாவரவியல் ஆர்வலருமான ராமசுப்பு கூறியிருக்கிறார்.